روائع مختارة | بنك الاستشارات | استشارات تربوية واجتماعية | تعبنا مع أخي.. المراهق

السلام عليكم.. المشكله مع اخي اصغر مني ب 7 سنين عمره 15 سنه, مبكر الذكورة اي انه بيحلق ذقنه هو في مدرسه بنظام امريكي في خلال ال 3 سنين اللي فاتوا حاله كان كل شويه يتدهور عن الاول لحد ما السنه اللي فاتت درجته كانت 57%

مع العلم انه ابويا وامي حنينين جدا ولكن سلبياتهم من وجهة نظري انهم مدلعينه يعني اجدد موديل موبيل معانا انا واخويا عندنا لابتوبات بابا مش بيبخل عليه بحاجه وهو بيخرج كل اسبوع مع اصحابه وبابا بيدفعله فلوس عشاه والتاكسي وكله واللبس دايما كويس وكل شويه يشتري.

بابا اللي بيذاكر لاخويا عشان عمتا المدارس لا يعتمد عليها ومش بيذاكر مع ماما ولا معايا عشان هو خلاص اتعود على بابا وبابا عارف نظام المدرسه ولكن المشكله ابتدت انه من ساعة سن المراهقه ما ابتدى
وهو بقى صعب التعامل معاه مش طايقنا بيتكلم بطريقه مش كويسه ساعات بتوصل لانه يزق بابا او ماما او الشتيمه

حاولنا نهديه ونجيبله ناس يفهموه مفيش فايده اشترك في خدمة البلاك بيري وبقى عايش عليها في عالم تاني وكل شويه يصاحب بنت ويا يسيبها يا تسيبه واحنا طبعا اللي بنتنكد عشان هو سابها او هيا سابته عشان الباشا بيكون مزاجه متعكر فولا ياكل ولا يخرج معانا احنا في السعوديه

وكثير كان يسيبنا لوحدنا انا ووالدتي نخرج وميجيش معانا عشان مزاجه كده او الطرق حتكون زحمه فمش عايز يتبهدل معانا او مش عاجبه مكان الخروجه لما نحاول نطلب من والدي الحل مش بيعرف ياما والدتي اترجت والدي انه يكلمه مش بيعرف

والدي راجل عملي مش بتاع احاسيس و كده وربانا على نفس الطريقه انه احنا نكتم اللي جوانا ومنتكلمش بس نطلع غلنا في غيرنا والدتي قالت له اقعد اكلم معاه هو محتاج حد يصاحبه مكانش بيعرف و كل اللي بيهمه انه اخويا يذاكر وياكل كويس

لحد ما والدتي جت قعدت معايا في مصر اخر سنه ليا في الجامعه واخويا قعد مع والدي وقتها ماما خلت والدي يحلفلها انه مش حيضرب اخويااخويا وقتها حس بالوحده واصحابه مش اللي هما الاصحاب الجدعان وكده اللي يكونوا جنب الواحد دايما فكان يحاول يقرب من بابا بردو ملوش غير مذاكره واكله و لو عايز يخرج يخرج

أنا والدي راجل كويس جدا انا مقصدش حاجه وحشه فيه بس هو مقصر من ناحيه الحوار مع اخويا ولما نييجي نشتكيله من اخويا يقولنا يعني اعملكم فيه ايه اضربه و لا ايه لاء انت بس تديله وش وحش متديلوش فلوس كتيره متخرجوش براحته اوي متخليهوش يسوق العربيه يحس بقيمة الفلوس شويه

 (اخويا من ساعة ما اتولد وهو هنا في السعوديه انما انا لاء عشت في مصر كتير وكانت بتمر علينا فترات لازم نمسك فيها ايدينا) فلما كان يتعصب عليه كان يضربه ومن غير رحمه بجد يعني ممكن يخبطله راسه في الحيطه يرميه بتقيلة ورق في راسه يخنقه

بابا وقت العصبيه مش بيعرف غير الدمار ومع انه انا وامي بنكون قايلينله اه ربيه بس وقت ما بابا بيضربه بنحوشه عنه من كتر اللي بيعمله فيه السنه ديه غير بقى كل سنه كنا في مصر و زاد تطاوله علي بالالفاظ ولما اشتكي واعيط لاهلي يقولولي انت اللي غلطانه -

لما نزلنااول يوم واشتراك النت بتاعه قطع قالهم لو مشحنتوليش النت انا حكسر البيت ده - لو مخرجناش مكان ما هو عايز وهو جاب اللي عايزه يعني مثلا احنا ناكل اكل بمصاريف معقوله لكن هو لازم ياكل اكل من المطعم الفلاني ولبسه لازم ماركه من اول التيشيرت للشوز

ومن اول السنه الدراسيه مش عايز يذاكر عايش عالموبيل وتليفون البيت ورغي متواصل بالساعات - كان في الاول بيحكيلي يقولي بيكلم مين مصاحب مين بنات دلوقتي بطل و انا بقيت اقرف منه - امبارح رجعت من شغلي وقعدت اتغديت مع والدتي كان وقتها نايم وانا داخله انام كان صحي ومسك تليفون البيت

وشغال رغي بردو مع انه وراه مذاكره - رحت انا فاصله كابل التليفون و انا داخله انام فطبعا راح يتخانق مع ماما وشتمها قالها يا غبيه (ديه اقل شتيمه بإعتبار انه الليله اللي قبلها والدي خلاه يسوق العربيه وقاله لحد مكان معين

ولما وصلوله والدي قاله خلاص انزل قاله لاء فوالدي قاله يلا انزل قبل ما البوليس يشوفنا راح قايله بعلو صوته أحا وبعدها والدي تعامل معاه عادي جدا
ولا كانه قال حاجه مع اني قلتله شوف ابنك ده بيقول ايه) بعد ما شتم والدتي هيا راحت ضربته على كتفه راح واخد مفتاح العربيه والبيت ونزل

والدتي جريت وراه باسدال الصلاه تدور عليه في الشارع لقته جاي ناحية العماره وبيعيط قعدت تساله مالك قالها كتفي بيوجعني كانك كسرتيه ورفض يطلع معاها كان وقتها في جارنا شاف كده فقاله تعالى البيت عندكم نتكلم رفض يتكلم معاه وقاله انا عايز بابا وبابا وقتها كان في شغله قاله طيب تعالى عندي البيت نهدى شويه

راح معاه وقاله انه مش حيكلم اصحابه من تليفون البيت تاني وأنه ماما ضربته وانه ماما هزئته قدام اصحابه بعدها ماما راحت تجيبه قعد في البيت 5 دقايق وراح نازل الشارع تاني استنى لحد ما بابا جه وقعد يتكلم معاه شويه وبعد كده طلعوا.

بابا دخل البيت ماما بتحاول تفهم منه قاله ايه و ازاي يتصرفوا معاه مسك راسه وقالها انا تعبان كفايه بقى سيبوني قعدت ماما تقوله انه لازم يتصرف
ولازم يقعد مع اخويا ويفهم في ايه وقتها اخويا جه من قوضته وقالهم يعني حتى دلوقتي بتتخانقوا وأنا عمال بعيط ومحدش يشوف مالي وراح سايبهم وماشي
ورجع غرفته

وبعدها بابا قام نام والبيت كله مولع وبليل دخلت على الفيس بوك بتاعه كاتب انا في مصيبه سرقت عربية والدي وعملت بيها حادثه بس الظاهر انه خبط حد مش اتخبط عشان العربيه سليمه ومش عارفين نعمل ايه معاه ولا نتصرف ازاي هو كويس بس مش بيصلي الا الصبح والجمعه وبيقرى الكهف بس مش مواظب على باقي الصلوات خالص

نعمل ايه معاه وبابا ازاي يتعامل معاه واخويا شايفه انه لازم يكون جنبه بس ابويا مش قادر يتواصل معاه والدتي كانت بتشتغل ولظروف شغل من اول الشهر اللي فات وهيا مش بتشتغل نعمل ايه انا وهيا نساعد بيه

في احتمال كبير انه انا وماما ننزل تاني مصر لوحدنا عشان اكمل ماجستيري واخويا عايز ينزل معانا بس ولا انا ولا ماما حنقدر عليه ولا حد فينا متابع مذاكرته ايه الحل بجد تعبنا والبيت كله مجهد

بسم الله الرحمن الرحيم.

الأخت السائلة الكريمة:  حفظكِ الرحمن.. . آمين.

السلام عليكم ورحمة الله وبركاته وبعد:

فبخصوص السؤال عن حالة أخيكِ الصغير والذي يبلغ عمره(15) سنة رغم أن عرض المشكلة كان بلهجة غير واضحة تماماً ,ولكن نقول مشكلة الأخ ما يلي:

أولاً: هذا الأخ يمر بمرحلة المراهقة المبكرة وهو في أولها حيث تبدأ عن بلوغ الوالد سن (15) سنة وهي مرحلة خطرة جداً تحدث فيها تغيرات فسيولوجية ونفسية وعضوية كبيرة جداً لابد من مراعاة ذلك, ويمكن القراءة حول هذا الموضوع من خلال الكتب المعتمدة والمواقع الجيدة والتي تصف تلك المرحلة بشيء من التوضيح والبيان.